چل چل علي يا الرمان .. ماذا تعني !

باللهجه العراقية العامية ولكن بالوقت الحاضر طبعا ما معروفة او ما مستعملة كلمة (چل چل ) 

ومعناها ( انتشر ) او( خيم عليه ) ...

لذلك چلچل عليه الرمان معناها ( انتشر عليه او خيم عليه الرمان ) .. والشاعر هنا ما يقصد الرمان المعروف وانما يقصد الدولة العثمانية أو الاستعمار العثماني يعني الاتراك الذين احتلون العراق لأن اغلب السلاطين والموالي والباشوات العثمانيين كانوا يلبسون على رؤؤسهم طربوش احمر بلون الرمان ..وطبعا يقصد انه الدولة العثمانية او الاحتلال العثماني الي كان منتشر بالعراق ومخيم عليه ...

يرجع الشاعر يكول(نومي فزعلي ) النومي اللي يقصده هنا منو ؟؟؟؟

هاي هم بيها معنى سياسي واللي بقصده الشاعر بالنومي هو الاستعمار البريطاني لان البريطانيين يعني الانكليز احتلوا العراق خلال الحرب العالمية الاولى 1914 وطردوا العثمانيين من العراق ...وطبعا بما انه الدولة العثمانية كان اسمها اواخر ايامها (الرجل المريض) لذلك جانت احوال العراق سيئة جدا وطبعا الانكليز وعدوا الشعب العراقي بتخليصهم من الاحتلال العثماني لذلك الشاعر ايكول (نومي فزعلي) لانه الانكليز بشرتهم بياض على صفار يشبه النومي الي هو الليمون المجفف...

يرجع الشاعر ايكول بنفس الاغنية : هذا الحلو ما اريده ودوني لأهلي ...

وهنا يقصد بيها انه هذا اللانكليزي الحلو والاشكر مثل النومي طلع اسوأ من المستعمر العثماني اللي شبهه الشاعر بالرمان بالبيت الاول ... ويرجع ايكول ( ودوني لأهلي ) يعني يقصد ما يفيدنا غير اهلنا العراقيين لا العثماني ايفيدنا ولا الانكليزي ... ويقصد الشاعر بعد شي اخر وهو انه المستعمر العثماني اتبدل بالمستعمر اللانكليزي والحال نفسه من سيء الى اسوأ ..

ولذلك اشتهرت هذه الاغنيه اشتهار واسع وتعتبر من الاغاني الشعبية الجميلة والمعبره وبيها معاني سياسيه غير مكشوفه ولكن مكتوبة بشكل جميل جدا .. ومع الاسف اسم الشاعر لهذه الاغنية لا يزال غير معروف بشكل صحيح وايضا اكو اختلافات على اسمه بالكتب التراثية العراقية .

* للأمانة هناك معلومات نقلت وعدلت بشكل بسيط 

تحية اخوية الى #حمزة_نمرة على هذا الاداء والاحساس الرائع